7大美國營養標籤變身位！

噚日美國第一夫人Michelle Obama宣佈，FDA（美國食品藥品管理局）將改革沿用超過20年嘅營養標籤，其中最大改變係新增「添加糖（added sugar）」一欄，回應近年添加糖危害健康嘅關注。一齊睇下新舊標籤有乜分別啦！

新增「添加糖」一欄 同天然存在於食物嘅糖（如水果嘅果糖、蜂蜜嘅葡萄糖、奶類嘅乳糖）唔同，添加糖係生產商額外添加於食物之中，被視為肥胖、糖尿病、心臟病等慢性疾病嘅元兇。高危食物包括糖、蛋糕、酥皮糕點、餅乾、果汁、汽水等。
「食用分量」字體大咗、分量更貼近現實 除睇落更顯眼，數字須反映啲人通常食幾多（例如好多人會食多過早餐麥片列出嘅食用分量），根據食用分量計出嘅營養資料就更貼近真實攝取量。
「卡路里」字體大咗
新增「維他命D」同「鉀」 全國調查發現美國人普遍攝取「維他命D」同「鉀」不足，增加患慢性疾病風險。維他命D有助骨胳健康，鉀則可降血壓。
新增營養素實際分量 除咗營養素參考值百分比（%Daily Value），實際分量令人更清楚食物中有幾多營養。
剔除「維他命A」和「維他命C」 因為依家好少人會維他命A或C不足，所以唔再規定生產商必須列明。
剔除「脂肪卡路里」 因為認清脂肪種類（如反式脂肪對健康更有害）比脂肪熱量更重要，所以從標籤中剔除。

另外，營養素參考值Daily Value修改至符合最新營養指引，說明也較易理解。部分可以一次過食或分幾次食嘅食物（例如薯片），生產商須提供「雙列（Dual Column）」標籤，列明唔同食法嘅營養攝取量。

資料來源：美國FDA

留言